GENERAL SANTOS CITY – Gideklarang persona non grata sa Sangguniang Panglungsod si OIC city PNP director P/S/Supt. Ruel Berango.
Kini human nagkahiusa ang tanang mga konsehal atul sa natigayong regular session kagahapong adlawa, kalabot sa naasoy’ng lakang.
Una niini, atul sa iyang privilege speech, gisugyot ni Kag. Rosalita Nuñez, ang pagdeklara kang Berango isip persona non grata sa siyudad.
Gumikan matud pa kini sa wala pagtuman ni Berango sa kamanduan nga gipagawas sa konseho, ug ni Mayor Ronnel Rivera, kalabot sa pagpasirado sa mga small town lottery (STL) outlets sa siyudad, gumikan walay concurrence gikan sa Sangguniang Panglungsod.
Gisuportahan kini sa tanang kaubanang konsehal ni Nuñez, human nga pormal nga nagmosyon si Kag. Beth Bagonoc, nga gisegundahan ni Kag. Franklin Gacal, pinaagi sa joint session.
Kahibaluan nga giulan ug pagsaway ang OIC city PNP director ug naapektuhan ang relasyon niini sa SP, gumikan gawas sa kapakyasan nga tumanon ang kamanduan sa konseho ug sa mayor sa pagpaundang sa operasyon sa STL sa siyudad, daw sa napasagdan uasb matud pa niini ang seguridad sa siyudad, kung saan sunud-sunod ang mga natala nga pagpamusil-patay sa mga nakalabay’ng mga adlaw.
