GENERAL SANTOS CITY – Usa ka dakong sagpa ug insulto ang wala pagtuman ni OIC city director P/S/Supt. Ruel Berango sa kamanduan ni Mayor Ronnel Rivera may kalabutan sa pagpanundang sa operasyon sa STL sa dakbayan.
Kini human nga makaduha ka higayon nang nagpagawas ug kamanduan ang mayor alang sa gilayong pagpasirado sa tanang mga STL outlets sa siyudad, kung asa sa ikaduha, gipahinungod na gayud ngadto kang Berango ug sa tanang mga chief of police sa siyudad.
Sa pakighinabi sa Bombo Radyo, gibutyag ni Kag. Franklin Gacal nga kon siya si Mayor Rivera, angayang gitangtang na niini sa pwesto si Berango.
Dungan niini, gihagit ni Kag. Gacal ang mayor nga mupili na ug bag-ong city director sa kapulisan.
Kini gumikan anaa na matud pa sa Kampo Krame ang listahan sa lima ka mga pwedeng mahimong PNP city director sa siyudad.
