GENERAL SANTOS CITY – Ipatawag sunod adlaw’ng Martes atul sa sesyon sa Sangguniang Panglungsod si OIC City PNP Director Romeo Berango aron hatagan ug pagpaklaro kung unsa ang gihimo nganong miabut na sa 55 ang ihap sa napatay dinhi sa dakbayan.
Matud ni Konsehal Franklin Gacal Jr. nga ‘alarming’ na ang panghitabo tungod lakip sa biktima sakop sa Philippine National Police.
Gitawag pa niini nga walay kwenta nga opisyal si Berango tungod sa wala pa gani matapos ang bulan sa Setyembre aduna nay pito ka biktima ang napatay.
Gani gihagit pa niini ang labaw nga opisyal sa kapulisan nga dili manghambog ug hatagan sa hustisya ang mga biktima.
Kahinumduman nga gikumpirma ni Police Supt. Ruel Sermese, Deputy Director for Operations sa General Santos City Police Office nga 55 na ang napatay nga binuhatan sa mga motorcycle-riding criminals ug kasagaran niini ang wala mahatagan sa hustisya.
Samtang sa pikas bahin gibutyag ni City Councilor Lourdes Casabuena nga iyang namonitor ang halos matag adlaw nga pagpamusil dinhi sa dakbayan.
Gani iya matud pang hangyuon si South Cotabato First District Rep. Pedro Acharon Jr. nga i-amyenda ang helmet law nga unang gihangyo sa kapulisan aron mailhan ang mga suspek nga gaganitan ug motor.
Matud sa konsehal nga kung wala na unyay helmet dali na lamang mailhan ang mga motorcycle riding criminal.
Matud sa konsehal nga bisan ug adunay CCTV dili mailhan ang mga suspek tungod sa sul-ob nga helmet.
