GENERAL SANTOS CITY – Masuk-anong gisaway sa mga opisyal sa Glan, Sarangani ang misulat sa report kalabot sa matud pa 10 ka Maute members gikan sa Marawi nga pugsanong misulod sa usa ka ospital sa ilang munisipalidad aron magpatambal.
Hugtanong gipanghimakak mismo ni Dr. Eden Rose Malanao, chief of hospital sa Glan Medicare Community Hospital ang nahisgutang report nga migawas sa usa ka nasyunal nga mantalaan.
Gitawag nga iresponsable ni Police Chief Inspector Neil Wadingan, hepe sa Glan Municipal Police Station, ang nagsulat sa nahisgutang balita nga matud pa walay basehan.
Sumala pa nga silingan lamang sa naasoy’ng ospital ang ilang presinto, hinungdan nga imposibleng makasulod ang mga terorista.
Susama usab ang pahayag sa mga opisyal sa LGU-Glan, hilabi ba nga tungod sa naasoy’ng sayop nga report, nagkaguliyang ang daghang residente, ug bisan asa na lang gapanawag aron i-verify ang taho.
Sa interview usab sa Bombo Radyo Gensan kang Lt. Daryl Cansancio, tigpamaba sa 73rd Infantry Battalion Philippine Army, gibutyag niini nga gituyok ug gisuhid na nila ang tanang mga ospital sa tibuok probinsya, lakip sa mga pwedeng dungguan sa mga terorista.
Apan migawas sa ilang monitoring nga negatibong may mga miyembro sa Maute Group nga nakalusot ug nakalusot sa Sarangani.
