GENERAL SANTOS CITY – Patay ang usa ka lalaki human nga pugsanong gisulod ang ilang panimalay ug gidunggab sa kanhing kapuyo sa iyang ka-live in.
Naligo sa iyang kaugalingong dugo ang biktima nga giilang si Arcelito Agan alyas Ontoy dihang naabtan sa kapulisan nga nagbuy-od sa sala sa ilang gipuy-an sa Prk San Vicente, Brgy Baluan ning dakbayan.
Nahitabo ang insidente alas-3:00 kaganihang kaadlawon, kung asa ang kapuyo niini nga giilang si Gemma Manggoy, ang nakadagan luyo nga nakaangkon ug samad sa dughan ug tiil, kauban ang anak niini, ug kasamtangang anaa sa usa ka balay-tambalanan dinhi sa dakbayan.
Sa pakighinabi sa Bombo Radyo kang Gemma, gibutyag niini nga ang suspek mao ang kanhi niining kapuyo nga si Totong del Carmen, trabahante usa ka babuyan sa nasampit nga barangay.
Sumala pa nga miadto sa ilang balay ang suspek dayon giuna siya ug dunggab sa dughan ug sa tiil, ug gisunod si Ontoy.
Base sa pahayag sa anak ni Gemma, makapila ka higayon mitawag sa iyang inahan ang suspek ug gibaharan nga pamatyon sila. Luyo sa paghangyo ni Gemma nga dili na muadto sa ila, gidayon gayud sa suspek ug gihimo ang krimen.
Samtang miadto usab sa crime scene ang orihinal nga asawa ni Ontoy nga si Alma Agan, kung asa nasayran nga usa ka tuig na silang bulag, ug may duha ka anak, apan ilaha matud pang balay ang gipuy-an nilang Ontoy ug Gemma.
Dungan niini, gibasol ni Alma si Gemma nga matud pa giangin ug napatay ang iyang bana.
Kasamtangan pang gipaabot ang SOCO nga maoy musuta sa patay’ng lawas sa biktima aron masayran kon pila ka samad-dinunggaban ang naangkon niini.
Samtang, usa ka silingan ang nagsaysay nga nakita niini ang duha ka lalaki nga suspek nga yano lang nga nagbaktas una ang insidente.
Sa pagkakaron padayon ang pag-imbestiga sa kapulisan ang naasoy’ng insidente.
