GENERAL SANTOS CITY – Mikunhod ug mukabat sa 60 ngadto sa 80 porsyento ang natala nga krimenalidad sa Polomolok, South Cotabato.
Kini ang gipasigarbo ni Police Senior Inspector Hernan Gabat, deputy station commander sa Polomolok Municipal Police Station.
Sumala pa nga ilaha nang na-neutralize ug nasikop ug nakasuhan na ang kadaghanan sa mga kriminal sa ilang area of responsibility.
Apan wala gihapon matud pa sila nagkumpiyansa inay gipakusgan pa ang ilang kampanya batok sa krimenalidad.
Usa usab matud pa sa ilang gitutukan karon mao ang kampanya batok sa iligal nga sugal partikular na ang last two, kung asa base sa ilang monitoring, dili na ingon ka lantaran ang mga gapataya gumikan nahadlok na, luyo nga aminado nga wala pa gayud kini hingpit nga nasumpo.
Samtang gitutukan usab matud pa nila ang mga wanted persons kon pinangita sa balaod.
Gawas niini, mas gipahugtan usab ang seguridad sa ilang area of responsibility, kung asa padayon matud pang gapahigayon police visibility, aron magpabiling luwas ug hapsay sa ilang lugar.
