GENERAL SANTOS CITY – Gi-discourage sa City Social Welfare and Dev’t Office ang ‘inato’ kon sabot-sabot lamang ang sistema sa pagsagop og bata.
Matud ni Arlene Amolar, officer-in-charge sa Adoption Reception Referrel Unit sa CSWDO nga angayang muagi sa legal nga proseso ang pagsagop kon asa adunay agian nga mga proseso, may sundon nga mga patakaran og adunay huptan nga mga dokumento pamatuod nga legal nga nasagop ang usa ka bata.
Sumala pa ni Amolar, bisan sa kaso kon diin ihatag ang anak ngadto sa igsuon nga walay anak ang angayan gihapong muagi sa legal nga proseso.
Gitawag kini nga relative adoption kon asa boluntaryong i-commit sa inahan ang iyang anak ngadto sa iyang igsuon.
Bisag mag-igsuon lamang ang nalambigit sa pagsagop, angayan gihapon nga magsumite og mga dokumento samtang i-assess usab ang capability sa magsagop.
Nasayran nga gisaulog ang Adoption Consciousness Week sa dakbayan.
Giawhag sa City Social Welfare and Dev’t Office ang buot nga musagop ug bata nga muadto lamang sa ilang buhatan aron matabangan kon asa libre ang ihatag nga assistance.
