GENERAL SANTOS CITY – Iligal ang gimando ni Pangulong Rodrigo Duterte sa mga police scalawags sa NCR nga ipalabay sa Basilan.
Kini ang panglantaw ni Atty Luis Salazar, inilang abugado sa dakbayan.
Sumala pa nga sagad sa mga nahimong desisyon ug kamanduan sa pangulo ang wala gibase sa due process o kaha naplanuhan, inay depende lamang sa iyang gibati hilabi na kon kini saputon, o kaha gibase sa nahimo niining kasinatian isip mayor sa Davao.
Matud pa kang Atty Salazar, base sa balaod, kon makasala ug makasuhan ug administratibo o unsa mang kaso ang mga pulis, dili mahimong i-transfer gumikan kinahanglan pa nila kining atubangon.
Apan tungod sa nahimong kamanduan kanila ni Pangulong Duterte nga didto sila ibalhin sa Basilan, daw sa gitabangan matud pa sila sa administrasyonc nga makalusot ug makalikay sa kasong administratibo nga giatubang.
Hinungdan nga kon ugaling gusto gayud sa pangulo nga ipadala sa Basilan ang nasampit nga mga hiwi ug nakasala nga mga pulis, angayang paabuton una nga matapos ang pagtaral sa ilang mga administrative case.
Gatuo si Atty Salazar nga dili maayo ang mga adviser sa pangulo gumikan sa mga “padalus-dalos” niining mga desisyon ug kamanduan.
