SARANGANI PROVINCE-Padayon ang monitoring sa Municipal Health Office (MHO) sa Malapatan, Sarangani Province sa 30 ka tawo nga nag-ihaw og nagkaon sa iro nga nakapaak sa usa ka bata nga lalaki nga napatay tungod sa rabies sa Barangay Kihan sa nasampit nga lugar.
Sumala sa otoridad, kaniadtong Hunyo 10 namatay ang 9-anyos nga bata nga lalaki nga napaakan sa iro kaniadtong Mayo 18 samtang nagadula sa gawas sa ilang balay apan wala nag-istorya ang bata.
Kaniadtong Hunyo 9, nakabatyag kini og mga sintomas gani gidala sa Rural Health Unit (RHU) og nahatagan sa una nga dose sa bakuna.
Apan pagkasunod nga adlaw, nagsamot ang mga sintomas hangtod napatay ang bata.
Gilayon nagpahigayon og contact tracing ang health authorities og nadiskubre nga gi-ihaw og gikaon sa 30 ka tawo ang iro gani gipailalom sila sa isolation.
Nabakunahan na usab ang mga nasampit nga indibidwal.
Ginaimbestigahan usab kun mahimo sila nga pasakaan og kaso tungodsa pag-ihaw sa iro nga posible nga adunay rabies.
Base sa datos sa MHO-Malapatan, kini ang unang natala nga kaso sa rabies nga gikamatay sa menor de edad ning tuiga.
