GENERAL SANTOS CITY – Gikumpirma ni Police Senior Inspector Hernan Gabat sa Polomolok Municipal Police Station, nga walay foul play sa pagkamatay sa usa ka 75 anyos nga lalaki nga residente sa Cagasan Ext. Brgy Poblacion, Polomolok, South Cotabato.
Kini human gikabutyag nga gipusil sa biktima nga giilang si Fred Dela Cruz, ang iyang kaugalingon, partikular sa ulo, hinungdan nga nakabsan sa kinabuhi.
Kahibaluan nga nakaplagan na lamang kining wala nay kinabuhi sa iyang anak sulod sa ilang panimalay, kagahapon sa kaadlawon.Nakaplagan usab sa kilid niini ang caliber 38 revolver nga gigamit niini sa pagkutlo sa iyang kinabuhi.
Nasayran nga wala na naantos sa naasoy’ng edaran ang sakit nga diabetes.
Ug gani, nagpadungug-dungog matud pa kini kaniadto nga buot nang magpakamatay tungod sa sakit.
Samtang, wala pa matumbok kon asa gikan ang armas nga gigamit sa edaran sa pagpusil sa kaugalingon.
