GENERAL SANTOS CITY – Giandam na sa Philippine Drug Enforcement Agency Regional Office 12 ang kasong ipasaka batok sa pito nila ka dinakpan human nga gipatuman ang search warrant sa car wash atubangan sa usa ka tulunghaan sa Polytechnic, Nat’l Highway, Brgy. Labangal.
Patung-patong nga kasong pagsupak sa Comprehensive Dangerous Drugs Act of 2002 ang target og mao usab ang tag-iya sa car wash nga si Carlo Saturgo, 32, minyo, taga Brgy. Apopong. Sikop usab ang mga kaubanan nga silang Herwinn Acharon, 33 anyos og Rio Anthony Gaabucayan, 37, pulos residente sa Sarangani Homes, Phase 1, San Isidro; Jay Jay Tabaniag, 30, taga Prk. Saludin, Labangal, GenSan; Joji Salangsa, usa ka babaye, 31 anyos, taga Prk. Malakas, Brgy. Mabuhay GenSan og usa ka menor de edad nga lalaki.
Narekober sa otoridad ang duha ka dagko og tulo ka gagmay nga sachets sa shabu nga adunay gibug-aton nga 25 gramu og may estimated value nga P187,500.00, lakip ang unom ka empty sachet nga adunay shabu residue og mga aluminum foil strips.
Gisulod sa sakop sa PDEA ang car wash human nga makumpirma nga usa ka drug den sulod sa dugay nga surveillance.
Kini usa ka gatus metro ang gilay-on sa tulunghaan kung asa base sa intelligence report, mga estudyante ang pipila sa mga gaadto sa drug den.
Samtang, dungan sa gipatuman nga search warrant, usa ka lalaki nga adunay kadudahang lihok ang namatikdan sa mga otoridad sa lugar hinungdan nga gikapkapan.
Nakuha kang Dannyver Areglado, 31 anyos nga taga Prk. Thomasa, Brgy. Calumpang ang drug tooter nga may traces sa shabu residue hinungdan nga giaresto.
Nasayran nga pulos positibo sa gidiling droga ang pito ka suspek human nga gipahigayon ang drug test kanila.
