Boluntaryong nitahan sa otoridad ang nahibiling unom ka mga pulis sa Philippine National Police Drug Enforcement Group–Special Operations Unit (PDEG-SOU) sa Region 4A nga nalambigit sa pagpanulis ug pagpanglugos sa Bacoor, Cavite .
Matud ni PDEG acting director Brig. Gen. Elmer Ragay nga personal siyang miadto sa PDEG regional office aron makita ang pagsurender sa mga pulis.
Ang unom ka mga pulis, uban sa walo nga unang misurender, gidala sa PDEG headquarters ug pormal nga gipasakaan og kaso sa robbery in band ug rape.
Dugang pa, mag-atubang sila og mga kasong administratibo sa National Police Commission (NAPOLCOM).
Dugang ni Ragay nga ang mga pulis gi-relieve na sa ilang mga pwesto ug gibutang sa restrictive custody.
Giklaro niya nga ang unit commander lang sa mga nalambigit nga pulis ang gipulihan samtang ang mga wala nalambigit magpabilin sa ilang mga pwesto.
