Unom pa ka tripulante sa usa ka Vietnamese cargo vessel ang naluwas human malunod ang ilang barko duol sa Kagitingan Reef sa West Philippine Sea (WPS).
Padayon usab ang search and rescue operations alang sa ubang mga tripulante nga wala pa makit-i.
Matud sa Philippine Coast Guard (PCG), misaka na sa unom ang dugang nga mga tripulante nga naluwas human malunod ang Vietnamese cargo vessel Khoi Nguyen 18 niadtong gabii sa Hulyo 25.
Adunay kinatibuk-ang 62 ka tripulante nga sakay sa barko sa dihang nahitabo ang insidente.
Sa pagkakaron, 17 ka mga tripulante ang padayon pang gipangita sa mga awtoridad.
Dali nga gipahigayon sa PCG ang search and rescue operations subay sa mando ni PCG Commandant Admiral Ronnie Gil Gavan.
Nagpadala usab ang PCG sa BRP Malapascua ug usa ka eroplano gikan sa Palawan aron motabang sa pagpangita sa mga nawala nga tripulante.
Matud sa PCG, padayon silang nakigkoordinar sa Vietnamese Coast Guard aron makakuha og importanteng impormasyon nga makatabang sa rescue operations.
Gigamit usab sa mga awtoridad ang Search and Rescue Optimal Planning System, usa ka teknolohiya nga makatabang sa pagtino sa posibleng lokasyon sa mga nawala aron mapaspas ang ilang pagpangita.
Samtang, gitaho sa Chinese state media nga ang mga rescue team sa China maoy nakaluwas sa pipila sa mga Vietnamese tripulante duol sa ilang gitawag nga Chinese-occupied reef.
