Nakabalik na sa Pilipinas ang unom ka mga Filipino seafarer sa Turkey human maabsuwelto sa kaso sa drugas sa korte sa Turkey.
Ang DFA nagkanayon nga ilang giatiman ang pagpauli sa unom ka mga Filipino, kinsa napriso sa dul-an 11 ka bulan human ang ilang Panamanian-flagged cargo vessel nakit-an samtang nagdunggo sa usa ka pantalan sa siyudad sa Zonguldak sa Turkey niadtong Oktubre 2023.
Gipapauli dayon ang mga Filipino human sila giabsuwelto sa Ereğli Criminal Court niadtong Septiyembre 16.
“We are very happy that the Court declared the Filipinos innocent of the charges and that they have been released in time to spend Christmas with their families back home,” pahayag ni Philippine Ambassador to Türkiye Henry Bensurto.
Pinaagi sa Legal Assistance Fund (LAF) sa DFA, ang embahada sa Pilipinas mikuha og abogado nga magrepresentar kanila ug maseguro nga maprotektahan ang ilang mga katungod tungod kay dunay due process.
“Together with the embassy-hired lawyers and lawyers provided by the insurance company of the manning agency, embassy representatives attended all three court hearings in June, July, and September 2024,” pahayag sa DFA.
Atol sa iyang opisyal nga pagbisita sa Turkey niadtong Hunyo 2024, si DFA Undersecretary Eduardo Jose de Vega mibisita sa mga seafarer nga napriso aron susihon ang ilang kahimtang.
Nakigkita usab si De Vega sa iyang counterpart gikan sa Turkish Ministry of Foreign Affairs ug sa mga awtoridad sa penitentiary aron masiguro ang kaluwasan sa mga Filipino sa Turkey.
