GENERAL SANTOS CITY – Bangi sa yuta ang usa sa gituuhang motibo sa natigayong pagpamusil sa Prk 1 Sta Rosario Brgy Glamang, Polomolok, South Cotabato, kagahapon sa hapon.
Kini ang ang gibutyag sa mga sakop sa Polomolok Municipal Police Station, kung asa ang mga biktima giilang sila si Dionisio Andojar, 31-anyos, Brgy Calumpang, ug Ricardo Molarto, 55-anyos, nga taga-Prk 4, Sta Rosario Brgy Glamang, Polomolok, South Cotabato.
Kahibaluan nga gipusil ang mga biktima sa wala mailhing suspek, kung asa si Andojar ang nakaangkon ug samad-pinusilan sa tuo nga tiil, samtang si Molarto sa wala nga paa.
Alas-5:00 sa hapon nadala sa pribadong balay-tambalanan dinhi sa dakbayan.
Samtang sa laing ospital nadala ang lain pang upat ka biktima nga silang Galindo Jevin, 25 anyos, taga-Brgy Calumpang; Malinog Juancho, 37-anyos, taga-Saeg, Calumpang ning dakbayan; Reynald Talatara, 16 anyos, taga- Sto. Niño, Brgy Glamang, Polomolok; ug Eleazar Tequillo, 29 anyos, gumikan sa mga naangkon nga samad-pinusilan.
May mga impormasyon pang nigawas nga may namatay sa nasampit nga insidente, butang nga padayon pang gikumpirma. Nagpadayon karon ang imbestigasyon sa kapulisan sa nasampit nga insidente, aron mailhan ang suspek, ug matumbok ang tinuod nga motibo sa krimen.
