Padayon ang imbestigasyon sa mga awtoridad kabahin sa pagkadiskubre sa patayng lawas sa usa ka lalaki sa kanal sa Purok Tagumpay, Barangay Poblacion, Tantangan, South Cotabato, pasado alas 5:40 sa buntag, Lunes, Disyembre 1.
Giila sa pamilya ang biktima nga si Juan Ogena Roxas Jr., walay trabaho, ug residente sa Purok Lower Maligaya sa nahisgutang lungsod.
Sumala ni Police Major Romeo Albano, ang magtiayon, alyas Octavio ug Olivia, ang nakadiskubre sa biktima samtang naglakaw sila sa lugar.
Nakit-an nila ang lalaki nga naghigda sa karsada, busa gi-report dayon nila kini sa Tantangan Police Station.
Sa inisyal nga imbestigasyon, nakit-an si Roxas sa hapon sa Nobyembre 30 samtang nag-inom uban sa iyang mga paryente.
Gibutyag nga ang biktima mipauli pasado alas 8 sa gabii human nakainom og makahubog nga ilimnon.
Sa pagkakaron, dili pa sigurado kung adunay foul play sa iyang kamatayon.
Ang patayng lawas gidala na sa usa ka punerarya sa Tantangan alang sa post-mortem examination aron masuta ang hinungdan sa iyang kamatayon.
