Lima ka tawo ang naluwas human sa landslide sa Guidag-Surong, Baguio City niadtong Domingo sa gabii, Agosto 9, tungod sa padayon nga kusog nga pag-ulan.
Sumala sa Baguio City Public Information Office, nahitabo ang landslide pasado alas-7 sa gabii ug naigo ang tulo ka balay nga gipuy-an sa lima ka pamilya.
Base sa Baguio City Police Office, pito pa ka tawo ang padayong gipangita human matabonan sa nagun-ob nga yuta ang ilang mga balay.
Sa alas-8:59 sa gabii, upat na ang kumpirmadong naluwas—duha ka babaye, lakip ang usa ka bata, ug duha ka hamtong nga lalaki. Gidala sila dayon sa ospital alang sa medical treatment.
Pagsapit sa alas-9:40 sa gabii, mikabat na sa lima ang naluwas.
Gipadala na usab sa lugar ang mga personnel sa City Disaster Risk Reduction and Management Office, Baguio City Fire Station, Baguio City Police Office ug mga barangay first responder aron ipadayon ang search and rescue operations.
