Mosalang sa witness stand ang upat ka testigo sa pagpadayon sa impeachment trial batok kang Bise Presidente Sara Duterte sa Agosto 10, 11, ug 12, 2026.
Lakip niini si Xylene May del Campo, supervising auditor sa Commission on Audit–Intelligence and Confidential Funds Audit Office (COA-ICFAO), nga mitestigo na usab kagahapong adlawa. Iyang ihatag ang testimonya may kalabotan sa Article I nga naghisgot sa giingong sayop nga paggamit ug iregularidad sa liquidation sa P612.5 milyon nga confidential funds sa Office of the Vice President (OVP) ug Department of Education (DepEd).
Apil usab sa ipatawag si Marivic Pareja, hepe sa House Archives, aron mopresentar ug mopamatuod sa mga opisyal nga dokumento ug rekord gikan sa Kamara nga may kalabotan sa kaso.
Mosalang usab si Gina Acosta, kanhi Special Disbursing Officer sa OVP nga maoy nagdumala sa pagpagawas sa pondo atol sa termino ni VP Sara Duterte.
Samtang, motestigo usab si Edward Fajarda, kanhi Special Disbursing Officer sa DepEd, nga maoy responsable sa pagdumala sa paggasto ug pag-apod-apod sa confidential funds sa panahon nga si Duterte ang nagdumala sa ahensya.
Gipagawas na usab sa Trial Presiding Officer ang mando alang sa pag-isyu og subpoena sa maong mga testigo sa prosekusyon aron motambong sa impeachment trial sa sunod semana.
Ipadayon ang pagtaral sa Lunes, Agosto 10, alas-10 sa buntag.
