GENERAL SANTOS CITY – Gikustodiya sa Philippine Maritime Command ang upat ka Indonesian human nasikop tungod misulay unta sa pagpayuhot ug mga produkto gikan sa ilang nasud paingon dinhi sa siyudad.
Nasikop ang mga nahisgutan samtang sakay sa panagatan sa kadagatan atbang sa Puting Bato Brgy. Calumpang ning dakbayan, nga walay mga dalang paigong dokumento lakip sa ilang mga produkto nga dala.
Giila ang mga nahisgutan nga silang Vilma Anbahari Mangumpalis, usa ka midwife; Abdul Anbahari Dandil, 49-anyos, nga matud pa managsamang nagpuyo na sa Barrio Singko, Koronadal City; Jahibal Lono, taga-Manado, Indonesia; ug si Nely Lis Tonoso Menduteneme nga taga-Glan, Sarangani Province.
Narekober gikan kanila ang usa ka kahon sa detergent, usa ka kahon sa noodles, usa ka kahon sa insect spray, ug lima ka container sa gasolina nga anaa matud pa sa kinatibuk-ang 70 litros.
Giandam na ang kaso nga ipasang-at batok sa mga naasoy’ng langyaw, samtang gipaabot ang taga Bureau of Immigration(BI) alang sa pagpa-deport sa mga nahisgutan.
