Anaa sa 38 ka lugar sa Luzon ang gibahaan tungod sa pag-ulan dala sa Bagyong Bising ug sa habagat.
Bisan pa niini, gireport ni Office of the Civil Defense (OCD) officer-in-charge ASec. Bernardo Rafaelito Alejandro IV nga hangtod karon walay namatay o nawala nga mga indibidwal.
Gitataw usab sa opisyal nga walay natala nga lapad nga mga insidente sa pagbaha dili sama sa nangaging sunod-sunod nga mga bagyo nga miigo sa nasod niadtong 2024.
Matod niya gamay ra ang epekto sa baha nga nasinati.
Bisan pa niini, gipanid-an sa ahensya ang sitwasyon sa probinsiya sa Pangasinan tungod sa posibilidad nga moawas ang Agno River nga makamugna og pagbaha sa mga silingang lugar.
Sayo niini, alas 5:00 sa kaadlawon, hingpit nga nigawas sa nasod ang Bagyong Bising human kini nisulod og balik sa Philippine Area of Responsibility niadtong Domingo sa gabii.
