GENERAL SANTOS CITY- Nalutsan sa african swine fever ang taga Barangay Balu-an human gikumpirma ni Kapitan Armando Diamante nga naglibog asa gikan ang virus nga mitakboy sa tulo ka mga baboy.
Matud ni Kapitan Diamante nga posebli adunay topdown nga ginakargahan ug baboy nga gikan sa mga lugar nga positibu sa ASF nga misulod sa Balu-an ug namalit ug baboy.
Gani tulo ka purok na ang ilang gibantayan aron nga walay makagawas ug makasulod nga baboy sa lugar samtang nagpahigayon ug clearing, kabahin kini sa gipagawas nga memorandum aron bantayan ang nahisgutang mga lugar.
Gipaklaro niini nga sulod sa 500 meter radius ila nang nakuha ang mga baboy ug napailawom dayon sa culling. Gipaklaro usab nga inig kuha sa baboy itunol dayon ang bayad tungod may pundo na nga gigahin gikan sa South Cotabato Swine Producer.
Mukabat sa singko mil pesos ang kantidad sa anay ug sa dagko nga baboy samtang P3,500 sa fatening samtang mil- kinyentos ang bayad sa matag baktin ug tig usa ka libu alang sa bag-ong panganak.
Bantay sarado gihapon sa mga barangay Tanud ang Purok San Jose, Purok Masagana ug Purok San Isidro. Gani nag-disinfect na ang taga City Veterinary Office gamit ang mobile disinfection truck gikan sa Department of Agriculture.
