Gitakda sa Development Budget Coordination Committee (DBCC) ang sugyot nga pondo para sa sunod tuig na P6.793 trillion.
Kini human giaprobahan sa komite nga gipangulohan sa Department of Budget and Management (DBM) ang maong panukalang budget.
Ang gitakda nga national budget para sa 2026 mas taas og 7.4% kung itandi sa budget karong tuiga nga nagkantidad og P6.326 trillion.
Katumbas kini sa 22% sa gross domestic product (GDP) sa nasod.
Sa usa ka press conference human sa 191st DBCC meeting, gibutyag ni DBCC Chairperson ug Budget Secretary Amenah Pangandaman nga prayoridad sa 2026 national budget ang ‘human capital development’ pinaagi sa pagpasiugda og mga pamuhunan sa dekalidad nga edukasyon, healthcare, ug workforce upskilling.
Lakip usab ang padayong pagpamuhunan sa Build, Better More Infrastructure Program sa administrasyong Marcos ug digital transformation nga naka-align gihapon sa Philippine Development Plan (PDP) 2023-2028.
Matod ni Secretary Pangandaman, una nang nadawat sa DBM ang agency budget proposals nga nagkantidad og P10.101 trillion, apan tungod sa limitadong fiscal space ug sa saad sa gobyerno nga hinayan nga paubosan ang fiscal deficit sa medium term, nagpatuman ang ahensiya og hugot nga evaluation process.
Gitan-aw usab og husto ang kapasidad sa mga ahensya aron masiguro nga magamit sa hustong paagi ang pondo.
Samtang, matod sa DBM, target nga isumite ang 2026 National Expenditure Program sa Kongreso karong Agosto.
