GENERAL SANTOS CITY – Duha ka mga sakop sa NPA ang napatay human ang natigayong engkwentro sa Matan-ao Davao Del Sur, kagahapon sa buntag.
Kini ang gikumpirma ni Lt. Daryl Cansancio, tigpamaba sa 73rd IB Phil. Army, sa pakighinabi sa Bombo Radyo.
Milungtad matud pa ug usa ka oras ang naasoy’ng binayluay ug bala tali sa tropa sa gobyerno ug mga rebeldeng grupo. Ang usa sa napatay mao matud pa ang squad leader nga si Alyas Virgel, samtang ang laing usa ang wala pa matino kon si Alyas Jun o si Alyas Jerry, butang nga padayon nilang ginaberipika.
Gibutyag ni Lt. Cansancio nga ang naasoy’ng engkwentro ang ika-upat na nga insidente sa serye sa mga engkwentro sukad sa nakalabay’ng mga adlaw sa nasampit nga area.
Tungod matud pa kini sa mga natala nga pagpang-ambush ug pagpanunog nga gihimo sa mga rebeldeng grupo sa Bansalan, hinungdan nga nagpahigayon ug combat operation ang kasundaluhan alang sa paggukod sa mga maong grupo nga gikabutyag nga mao ang Guerrilla Front 72, ilawom sa pagdumala ni Alyas Jam-Jam ilawom Far South Mindanao Regional Committee.
