Nagpagawas og warrant of arrest ang Las Piñas Regional Trial Court (RTC) batok sa 18 ka kanhing bodyguard ni kanhi kongresista Zaldy Co, nga mas nailhan sa bansag nga “maleta boys.”
Ang maong warrant giisyu ni Judge Kathryn Sabado niadtong Martes, may kalabotan sa upat ka kaso sa perjury nga giatubang sa matag usa sa mga akusado.
Nagkantidad og P18,000 ang piyansa sa matag kaso, busa mokabat sa P72,000 ang kinatibuk-ang piyansa nga kinahanglan ibayad sa matag indibidwal aron makagawas sa temporaryong kagawasan.
Sa pagkakaron, 14 na lamang sa mga kanhing bodyguard ang girepresentahan sa ilang abogado nga si Atty. Levito Baligod, human bawi-on sa upat ka uban pa ang ilang unang mga pahayag o salaysay.
Miadto sa korte ang kampo sa 14 ka akusado aron magpiyansa, samtang ang dili makahabol sa gitakdang panahon sa pagbayad sa piyansa mahimong ipailalom sa pagdakop sa Las Piñas Police.
Nag-ugat ang maong kaso human giangot sa mga kanhing bodyguard ang pipila ka opisyal sa gobyerno sa gipasanginlang flood control anomaly, diin ilang giingong adunay paghatod og mga maleta nga adunay sulod nga kwarta isip kickback.
Gisalikway sa mga opisyal ang maong mga alegasyon ug misang-at usab og mga kontra-demanda batok sa grupo.
Ang mga warrant of arrest gibase sa mga reklamo nga gisang-at nila House lawmaker Leila de Lima, kanhi senador Antonio Trillanes IV, kanhi National Security Adviser Eduardo Año, ug BuCor Chief Gregorio Catapang Jr.
Gawas sa kaso sa perjury sa Las Piñas, ang grupo ug ilang abogado nag-atubang usab og unom ka kaso sa cyber libel sa ubang korte sa Metro Manila tungod sa ilang mga pahayag sa social media ug mga press conference.
