Napahamtangan nga guilty sa korte ang 10 miyembro sa Aegis Juris fraternity nga maoy nagpaluyo sa pagkamatay ni Horacio “Atio” Castillo III.
Ang freshman law student sa University of Santo Tomas (UST) namatay tungod sa sobra-sobra nga pagkabun-og sa lawas niini sa gipahigayong hazing sa fraternity sa miaging 2017.
Giila ang mga napatud-an nga “guilty beyond reasonable doubt” sa Manila Regional Trial Court Branch 11 silang Marcelino Bagtang Jr, Danielle Hans Matthew Rodrigo, Jose Miguel Salamat, John Robin Ramos, Ralph Trangia, Joshua Joriel Macabali, Oliver John Audrey Onofre, Arvin Rivera Balag, Mhin Wei Chan og Axel Munro Hipe.
Ang napulo gipahamtangan ug reclusion perpetua o pagkabilanggo og hantod 40 ka tuig.
Gimandoan usab sa korte nga magbayad ang mga nasampit sa nahibiling pamilya ni Castillo og P461,800 alang sa actual expenses, P75,000 isip civil indemnity, P75,000 isip moral damages og P75,000 exemplary damages.
Ang maong kantidad may interest rate nga 6% matag tuig hangtod nga masapinal ang desisyon ug kini mabayran nga tibuok.
Sugod pa sa miaging Mayo 2018 nabilanggo na ang 10 akusado sa Manila City Jail.
Bisag naibtan og tunok ang mga ginikanan ni Atio, gusto nila nga mapanubag ang UST tungod matud pa sa kapakyasan sa mga pagkaylap sa hazing sa mga fraternity.
