Dakong epekto ang nahimo sa surprise rally sa EDSA kagahapong adlawa dili lamang sa gobyerno kondili usab sa mga trabahante, estudyante, pasyente ug mga negosyo nga naapektuhan sa paghuot sa dagan sa trapiko sa EDSA. Mao kini ang gipadayag ni Palace Press Officer Usec. Claire Castro.
Gipasiugda ni Castro nga kinahanglan adunay permit ug koordinasyon sa gobyerno ang mga rally aron makapangandam sa gikinahanglang traffic ug safety measures.
Gipasabot usab niya nga tahuron sa gobyerno ang katungod sa mga katawhan sa pagpahayag ug pagprotesta basta kini uyon sa balaod.
Gipasiugda sa Malacañang nga gitahod sa administrasyon ang katungod sa mga mamamayan sa pagpahayag sa ilang opinyon ug pagprotesta, apan dili angay nga malapas ang balaod o maabala ang publiko.
Giingon usab ni Castro nga wala’y nakita nga hulga ang Malacañang gikan sa protesta, apan padayon nga gibantayan sa Pangulo ang sitwasyon tungod sa epekto niini sa trapiko ug sa mga motorista, trabahante, estudyante ug mga pasyenteng moagi sa EDSA.
Dugang pa niya, dakong abala ang kalit nga rally tungod kay wala kini’y permit ug wala usab kini mahibaloi daan sa gobyerno, hinungdan nga kulang ang pagpangandam alang sa pagdumala sa trapiko.
Matod ni Castro, imbestigahan ang bisan unsang posibleng paglapas sa balaod ug panubagon ang mga responsable kon gikinahanglan.
