GENERAL SANTOS CITY -Padayon ang pakiglambigit sa mga sakop sa Lagao Police station sa San Isidro Police station alang sa padayon nga pagsusi sa pagkatawo sa ulahijng biktima sa pagpamusil sa dakbayan.
Kini human gikabutyag ni Police Sr. Intr. Peter Pinalgan nga naa sa watchlist sa San Isidro Police Station ang biktima nga si Ernesto David, 40 anyos nga taga Purok Malinawon, Conel ning dakbayan.
Pasado alas dos sa hapon gipusil patay sa nag-inusara nga suspek si David samtang nagpaabut ug pasahero sa terminal sa habal-habal ang biktima sa Crossing Conel Lagao ning dakbayan.
Matud ni Sr. Instr. Pinalgan nga upat ka basiyo sa caliber 45 ang ilang nakuha sa lugar nga gigamit pagtiro sa suspek ngadto sa biktima.
Usa ka habal-habal driver ang biktima nga ila pang ginaimbestigahan ang background.
Gibutyag usab sa pipila ka tindera sa lugar nga makadaghan nga gireklamo ang nahisgutang biktima human nanguha ug tinda nga ilimnon nga wala gibayaran.
Miaging semana lamang may mireklamo nga pasahero human matud pa gipakyaw gikan sa Conel paingon sa dakbayan ug pabalik sa lugar apan nahitabo iya kining gibilin sa dalan.
Samtang, usa usab ang samaron human maangin ug naigo sa bala ang barbero nga giilang si Tommy Perez, 39 anyos, residente sa Oliverio Compound, NLSA Road Lagao ning dakbayan.
Gidala kini sa Dr. Jorge Royeca P. Hospital human makaangkon ug samad-pinusilan sa tiil.
