Giisip sa Malacañang nga usa ka kakulangan ang wala pagreport sa mga bangko ngadto sa Anti-Money Laundering Council bisan pa sa mga giingong “unusual” nga cash withdrawals gikan sa confidential funds sa Office of the Vice President ug Department of Education.
Kini ang pahayag ni Claire Castro human siya pangayoi og reaksyon sa testimonya sa duha ka kanhi branch managers sa Land Bank of the Philippines kalabot sa dagkong cash withdrawals sa OVP ug DepEd.
Matud ni Castro, gipakita sa maong testimonya ang kamahinungdanon sa transparency ug accountability sa paggamit sa confidential funds.
Dugang pa niya, kung ang usa ka transaksyon giila nga “unusual,” angay lamang kini nga susihon ug tan-awon kung kinahanglan ba kining ireport sa AMLC, bisan unsa pa ang kahimtang sa tag-iya sa account.
Gipadayag usab ni Castro nga igo na ang kasamtangang mga balaod, apan adunay problema kung dili kini matuman o kung adunay mga tawo nga tinuyo nga molapas sa balaod alang sa kaugalingong interes.
