Naglusad ang United Nations og donation drive aron makatigom og $275 million alang sa mga biktima sa magnitude 7.7 nga linog sa Myanmar.
Matud sa UN, ang matigum nga pondo ang gamiton aron nga matabangan ang mga naapektuhan sa linog.
Una niini gibana-bana sa UN nga kinahanglan nila makatigum og $1.1 billion nga pondo, base sa inisyal nga humanitarian aid plan alang sa 5.5 million ka tawo nga naapektuhan sa linog.
Apan ning higayona anaa sa lima ka porsyento pa lamang ang nahatag nga pondo.
Tungod sa nagkadako nga panginahanglan sa mga biktima sa linog, ang UN nanginahanglan og dugang nga tabang.
Magsilbing pokus sa bag-ong inisyatiba ang 1.1 million ‘vulnerable people’ sa Myanmar nga kasagaran mga bata og babaye nga sila gaatubang sa hagit sa natad sa gender-based violence, food insecurity og kakulangon sa tukmang access sa reproductive health.
Sa kasamtangan anaa sa 6.3 million ka tawo sa Myanmar ang nanginahanglan og dugang nga tabang gumikan sa ilang nagkalisod nga sitwasyon.
Kahinumduman nga Marso 28, 2025 natigayon ang kusog nga linog sa Myanmar kung asa kapin sa 3,600 ka tawo ang patay og daghan pa ang missing.
