Nagpagawas og report ang usa ka independenteng imbestigasyon sa United Nations nga nag-ingon nga adunay kaylap nga paglapas sa tawhanong katungod batok sa mga batang Palestinian sa Gaza ug West Bank, lakip ang mga posibleng paglapas nga mahimong ikonsiderar nga crimes against humanity, war crimes, ug genocide.
Sumala sa UN Independent International Commission of Inquiry on the Occupied Palestinian Territory, lakip ang East Jerusalem ug Israel, ilang gisusi ang mga panghitabo sukad misugod ang gubat tali sa Israel ug Hamas niadtong Oktubre 7, 2023.
Base sa ilang datos, gibanabana nga mga 30% sa mga nangamatay sa Gaza mga bata. Mokabat usab sa kapin 20,000 ka mga bata ang namatay gikan Oktubre 2023 hangtod Oktubre 2025.
Matod ni commission chair Srinivasan Muralidhar, adunay mga ebidensya nga nagpakita nga tinuyo nga gipunting ug gipatay sa Israeli security forces ang mga batang Palestinian, ug posible kini nga timailhan sa intensyon nga pahunongon o papason ang populasyon sa Gaza.
Gipunting usab sa report ang padayon nga paggamit sa kusog nga mga explosive weapons sa mga lugar nga adunay mga sibilyan, nga nakaresulta sa taas nga ihap sa mga batang namatay.
Dugang sa komisyon, mas taas ang porsyento sa mga batang namatay sa kasamtangang gubat kumpara sa miaging mga panagbangi sa Gaza niadtong 2008–2009 ug 2014, diin mga 24% lamang sa kinatibuk-ang namatay ang mga bata.
Gawas sa mga nangamatay, gipasiugda usab sa report ang grabe nga epekto sa gubat sa kahimsog, nutrisyon, ug mental health sa mga bata tungod sa pagpangbalhin-balhin sa lugar, kakulang sa pagkaon ug tambal, ug kadaot sa mga pasilidad medikal.
Sa West Bank ug East Jerusalem, gi-report usab ang pagtaas sa kapintasan nga giingong gihimo sa mga Israeli settlers batok sa mga batang Palestinian, lakip ang mga kaso sa torture ug mapintas nga pagtratar sa mga detainee.
Gisalikway usab pag-ayo sa Israel ang maong mga alegasyon ug gitawag kini nga “defamatory” ug “libelous.” Matod nila, ilang gibuhat ang tanan aron malikayan ang kadaot sa mga sibilyan ug ilang giinsistir nga wala giapil sa report ang mga aksyon sa Hamas.
Gipahayag usab sa Israel nga ang ilang operasyon kabahin sa pagtubag sa ilang gitawag nga “constant terrorist threat” sa maong rehiyon.
