Nakadawat og suporta si Ukraine President Volodymyr Zelenskyy gikan sa mga lider sa European Union (EU) atol sa katapusang adlaw sa EU summit sa Brussels, Belgium.
Kini may kalabutan sa nagpadayon nga panagbangi sa Ukraine batok sa Russia.
Nagkahiusa sa pagbarog alang sa suporta sila EU chiefs, European Commission President Ursula von der Leyen ug European Council President Antonio Costa, sa pag-awhag sa mga kaalyado nga tabangan ang Ukraine ug dugangan pa ang pwersa batok sa Russia.
Dugang pa ni von der Leyen nga dili nila bawion ang mga sanction nga gipahamtang sa Russia hangtod nga hunongon na sa maong nasud ang nagpadayon nga gubat.
Kini may kalabutan sa naunang desisyon sa US nga tangtangon ang mga sanctions nga gipahamtang niini sa Russian oil exports lakip na sa shadow fleet niini human sa nahitabong phone call tali ni US President Donald Trump ug Russian President Vladimir Putin.
