Tungod sa bag-ong mga sanction nga gipahamtang sa Estados Unidos batok sa mga airline sa Iran, nakasinati karon og lapad nga kalangay ug kagubot ang mga flights padulong ug gikan sa nasud.
Ubos sa kampanya nga gitawag og “Operation Economic Outcast,” gipahamtangan sa US og sanction ang 27 ka airline ug gipasidan-an ang mga langyaw nga tugpahanan nga naghatag og serbisyo sa mga eroplano sa Iran.
Tungod sa maong mga restriksyon, miabot na og 18 ka oras ang kanhi tulo lang ka oras nga biyahe samtang misaka usab ngadto sa kapin $1,000 ang presyo sa mga flight ticket.
Nakapahinabo usab kini og gibana-banang 20 porsyento nga pagkunhod sa mga international flights gikan sa Iran, nga miresulta sa dakong pagkawala sa kita sa mga airline ug travel agency.
Bisan pa man padayon ang pagpangita og solusyon sa gobyerno sa Iran, nagpabilin nga sirado ang kadaghanan sa mga direktang ruta samtang padayon ang mga ulahing kanselasyon sa biyahe.
