GENERAL SANTOS CITY – Human gihagit ni Kag. Jeng Gacal si PSSupt. Raul Supiter, City Director sa GSCPO nga aksyunan og ipaundang ang operasyon sa mga tolendoy sa dakbayan sulod sa 24 oras, sunod-sunod nga operasyon ang gipahigayon sa kapulisan sa syudad.
Sa AOR sa Fatima Police Station, tulo ka slot machine ang nakumpiska sa usa ka compound sa Zone 1 Blk 0 Fatima partikular sa pinuy-anan ni Wilga Lalutan, 27, minyo. Kagahapon, alas 9:00 sa buntag nakadawat og report si PSR Insp. Fernando Manuel Jr. hepe sa maong presinto kalabot sa slot machine sa maong lugar hinungdan nga nagpahigayon gilayon og anti-illegal gambling operation.
Gani nahitabo pa ang ginukdanay, apan wala madakpan sa kapulisan si Lalutan human nga paspas nga nakasibat. Narescue ang tulo ka menor de edad human nga naabtan nga nagdula og tolendoy.
Samtang, usa ka slot machine usab ang nakumpiska sa kapulisan human nga gipahigayon ang operasyon sa Sunrise Village Lagao.
Apan wala ang tag-iya sa balay nga gibilinan sa tolendoy nga si Reynaldo Cruz. Samtang, sa AOR sa Tambler Police Station, usa ka slot machine ang nakumpiska sa kapulisan sa pinuy-anan sa nagpangalan ug Edwin Lasigan sa Prk Saeg Calumpang.
DAkpan ang nasampit kagahapon alas 10:00 sa buntag human nga nagpahigayon ug operasyon ang kapulisan human nga nakadawat og report nga may tolendoy sa panimalay niini.
Ang mga nasampit ang pulos mag-atubang sa kasong paglapas sa RA 9287 in connection sa PD 1602.
