Mas taas pa ang approval ug trust ratings ni Bise Presidente Sara Duterte kon itandi ni Presidente Ferdinand ‘Bongbong’ Marcos, Jr, kini basi sa gipagawas nga survey sa Pulse Asia.
Kini nga survey gihimo niadtong Hunyo 17-24 diin sulod sa petsa sa pagluwat ni Sara sa Marcos Cabinet, partikular na sa iyang pagkanaog sa katungdanan isip secretary sa Department of Education (DepEd).
Base sa resulta, nakakuha ang bise presidente og approval rating nga 69 porsiyento nga mas taas og 16 puntos sa 53 porsiyento nga approval score ni Marcos.
Kung itandi sa samang survey nga gihimo niadtong Marso ning tuiga, nitaas og dos puntos ang approval rating ni Duterte gikan sa 67% samtang ang approval rating ni Marcos mikunhod og dos puntos gikan sa 55%.
Sa mga survey nga lugar, ang pinakataas nga rating sa performance ni Marcos kay sa Metro Manila nga adunay 61 porsyento (gikan sa 47 porsyento), gisundan sa nahabilin nga Luzon nga adunay 57 porsyento (gikan sa 66 porsyento), Visayas nga adunay 56 porsyento (gikan sa 54 porsyento) ug Mindanao nga adunay 38 porsyento (gikan sa 40 porsyento).
Sa bahin ni Sara, halos 95% sa ilang balwarte sa Mindanao niingon nga uyon sila sa iyang performance (gikan sa 92 porsiyento), gisundan sa Visayas nga adunay 80 porsiyento, Metro Manila nga 64 porsiyento ug ang nahibiling bahin sa Luzon nga anaa sa 54 porsiyento.
Kung trust o pagsalig sa pakigpulong ang hisgutan, dako ang ligas si Sara nga nakakuha ug 71% samtang si Marcos nakakuha lang ug 52%.
Nasayran nga adunay 2,400 ka respondents ning maong survey nga nag-edad ug 18-anyos pataas pinaagi sa face-to-face interview nga adunay ±2% error margin sa 95% confidence level.
