GENERAL SANTOS CITY – Gilauman nga ipagawas sa Court of Appeals sa Timor-Leste sa Hunyo 20 ang desisyon sa deportasyon sa gipalagpot nga Negros Oriental 3rd District congressman Arnolfo “Arnie” A. Teves Jr.
Kini ang pahayag ni Justice Assistant Secretary Mico Clavano, nga hapit na makabalik sa nasud ang kanhi magbabalaud.
Si Teves ang giaresto kaniadtong Marso 21 sa mga tigpatuman sa balaud sa Timor-Leste human nagpagawas ug red notice ang International Criminal Police (Interpol) batuk kang Teves kaniadtong Setyembre 5, 2023.
Kahinumduman nga nagpagawas ang Manila Regional Trial Court (RTC) Branch 51 ug warrant of arrest batuk kang Teves sa patong patong nga kaso nga may kalabutan sa pagpamusil kaniadtong Marso 4, 2023 sa Pamplona, Negros Oriental kung asa napulo ka mga tawo ang napatay lakip si provincial governor Roel Degamo.
Kaniadtong Pebrero 5, 2024, nagpagawas ug kamandu-an ang Manila RTC nga nagmando sa Department of Foreign Affairs (DFA) nga kanselahon ang pasaporte ni Teves.
