Gisalikway sa Taguig City Prosecutor’s Office ang reklamong perjury nga gisang-at ni Vice President Sara Duterte batok sa giingong kanhing aide niini nga si Ramil Madriaga.
Base sa 19-pahinang resolusyon, nakita sa mga prosecutor nga kulang ang ebidensya sa reklamong gisang-at sa Bise Presidente.
Dugang pa sa Taguig Prosecutor’s Office, dili igo ang mga ebidensya nga gipresentar sa nagreklamo ug wala napamatud-i nga namakak si Madriaga sa iyang gipanumpang salaysay, nga giingong paglapas sa Article 183 sa Revised Penal Code.
Niadtong Marso, nagsang-at si Duterte og reklamong perjury sa Taguig City Prosecutor’s Office batok kang Madriaga.
Ang maong reklamo gisang-at isip pagsupak sa reklamo ni Madriaga sa Office of the Ombudsman, diin giingon niini nga nakahatod siya og dakong kantidad sa kuwarta ngadto sa nagkalain-laing tawo subay sa mando sa Bise Presidente.
