GENERAL SANTOS CITY – Nakadawat na og bayad ang mga tag-iya og mga baboy sa Glan, Sarangani Province human nga naigo sa sakit nga baboy nga African Swine Fever (ASF) ang ilang binuhi.
Personal nga miadto si Mayor Vivien Yap sa Barangay Pangyan kauban ang mga empleyado gikan sa Sarangani Province ug sa Agriculture Office sa LGU Glan ug gipangbayran ang mga tag-iya sa baboy nga gipatay tungod ASF.
Ang maong financial assistance hinatag sa Sarangani Province.
Sa laing bahin, tungod usab sa kakulangon sa budget wala naapil sa ihap ang mga baktin nga naigo sa maong sakit.
Apan gibayaran ni Mayor Yap ang tag-iya sa maong mga baktin gamit iyang personal nga kwarta aron usab matabangan ang mga tagtungod sa maong mga baktin.
Kahibaluan nga ang Barangay Pangyan usa sa mga barangay sa Glan diin ubay-ubay gayud ang mga baboy nga naigo sa ASF.
Human sa paghatag sa salapi sa Barangay Pangyan, nilahos ang grupo sa Barangay Cablalan og gibayran ang mga tag-iya og mga baboy human nga gipatay ang ilang mga binuhi nga hayop.
