Target sa Department of Energy o DOE nga matangtang ang system loss charges sa bayranan sa kuryente sa dili pa ang kataposang State of the Nation Address o SONA ni Presidente Ferdinand Marcos Jr. sa sunod tuig.
Matud ni Energy Secretary Sharon Garin, dili sayon ang pagtangtang sa system loss charges ug dili kini basta-basta nga mandoan lang ang Energy Regulatory Commission o ERC nga wagtangon.
Sa budget hearing, gipangutana ni Caloocan City Representative Edgar Erice si Garin bahin sa saad ni Marcos sa iyang SONA niadtong Hulyo nga wagtangon ang system loss charges.
Matud ni Garin, partial pa lamang ang mahimong matangtang karong tuiga, apan target sa DOE nga mahuman ang proseso sa dili pa ang sunod nga SONA.
Gipasabot sa kalihim nga adunay technical ug non-technical system loss, busa kinahanglan himuon kini sa pipila ka hugna, lakip ang pagpugong sa pagpangawat og kuryente, consumer education, pagpauswag sa billing ug collection efficiency, ug pagdumala sa mga metro.
Gilauman usab nga mokabat og unom ka bulan ang mga electric cooperative sa pagpatuman sa gikinahanglang mga kausaban.
Samtang, gibanabanang mokabat sa P7.5 bilyon ang gikinahanglang pondo alang sa pag-upgrade sa mga metro, power lines ug uban pang imprastraktura aron mapakunhod ang technical ug non-technical system losses.
