GENSAN – Nag-atubang og kasong reckless imprudence resulting in damage to property ang usa ka motorista nga nadakpan sa kapulisan human kini makabangga ug duha ka sakyanan ug mosibat sa Barangay Fatima, General Santos City pasado alas-6 sa gabii niadtong Disyembre 7, 2025.
Base sa imbestigasyon, nakaigo ang suspek og tricycle ug laing motorista apan wala kini mohunong ug nagpadayon sa pagdagan.
Ang driver sa nabanggaan sa suspek nga motorsiklo ang dali nga mireport sa Tambler Police Station hinungdan nga gipahamtang og flash alarm ang sakyanan sa suspek nga Toyota Revo ug gilutos sa kapulisan.
Naabtan kini duol sa traffic light sa dalan Ariola, Barangay Bula apan nagpadayon gihapon sa pagsibat bisan anaa nay mga pulis.
Tungod sa grabeng pagpaningkamot sa suspek sa pag-ikyas, napugos ang mga otoridad sa pagpamusil sa ligid sa sakyanan aron mapahunong kini ug madakpan.
Padayon pa ang imbestigasyon sa insidente aron matino ang dugang detalyeng may kalabutan sa pagpanghitabo.
