GENSAN- Gikonsidera na sa kapulisan ang usa ka lalaki nga kainom sa biktima isip primary suspect sa pagpatay sa usa ka trabahante sa fishpond nga nakaplagang patay sa Purok 5A, Barangay Katangawan sa Dakbayan sa General Santos niadtong Lunes.
Sumala ni Police Major Robert Fores, hepe sa Police Station 8, nadawat nila ang report sayo sa buntag pinaagi sa ilang hotline mahitungod sa usa ka patayng nga nakit-an sa maong lugar.
Sumala ni Fores pag-abot nila area kon asa nahitabo ang kremin, nakita nila ang lawas sa biktima nga si Bilmar Marco Danieles nga naligo sa kaugalingong dugo ug adunay dakong hiwa sa liog.
Base sa inisyal nga imbestigasyon, tulo ka trabahante ang naa sa maong farm lakip ang biktima, ug ang usa kanila nga giila nga si Darwin Dawang nga ilang gikonsiderang suspek.
Gawas pa niini, adunay middleman nga nitabang sa kapulisan sa paghangyo sa suspek nga mosurender, ug nakapadala pa kini og voice recording nga nagpasabot sa iyang tinguha sa pagsurender.
Giingon usab nga giangkon sa suspek ang krimen ug gipasabot nga adunay dili maayong pagtrato kaniya nga duha na ka higayong gihimo kaniya sa biktima nga nahimong rason sa nabuhat niining krimen.
