GENSAN- Gipahibalo ni Raymond Ledesma, Bulaong Terminal Administrator nga padayon ang operasyon sa Bulaong Terminal bisan pa sa mga kausaban sa iskedyul atol sa semana santa, diin ang mga enforcers ug CCTV operators anaa gihapon sa duty samtang ang ubang opisina nga staff nagsunod sa work-from-home nga mando sa LGU.
Sumala kaniya, walay byahe ang YBL ugmang adlawa, Byernes, apan mubalik sa Sabado, samtang ang Mindanao Star magpadayon sa ilang byahe bisan pa sa Byernes Santo.
Dugang pa niya nga ang Husky wala usab byahe sa Byernes, ug ang kadaghanan sa mga van dili usab mobiyahe nianang adlawa.
Bisan pa niini, adunay pipila ka van nga magpadayon og byahe tungod kay cooperative ang ilang sistema ug ang ubang driver nanginahanglan og dugang kita ilabi na sa pagsaka sa presyo sa mga palaliton.
Sa laing bahin, gipasiugda ni Ledesma nga walay ipatuman nga fare increase sa bus ug public utility vehicles tungod sa ilang pagsunod sa mando ni President Ferdinand Marcos Jr..
Tungod niini, naglaum ang mga pasahero nga magpadayon ang hapsay ug makatarunganong serbisyo sa transportasyon bisan sa panahon sa semana santa.
