GENSAN– Gipahibalo ni Commission on Elections (Comelec) Region 12 Assistant Regional Director Atty. Jose Villanueva nga magpadayon pag-usab ang voter registration sa tulo ka buwan sa wala pa ang Barangay ug Sangguniang Kabataan Elections (BSKE) nga nakatakda karong Nobyembre 2, 2026.
Matud ni Villanueva, kini nga lakang usa ka oportunidad para sa mga wala pa nakaparehistro ilabina sa kabatan-onan nga gusto nang mamotar sa umaabot nga piniliay sa Barangay ug SK.
Giawhag usab sa opisyal ang publiko nga gamiton ang dugang nga panahon aron magparehistro. Hinuon hulaton pa ang ensaktong petsa kanus-a na usab mag-resume ang registration human kini natapos niadtong August 10.
Gipahinumdom sa Comelec nga ang pagbalhin sa petsa sa BSKE 2025 ngadto sa Nobyembre 2026 pinasikad sa Republic Act No. 12232 nga gipirmahan ni Pangulong Ferdinand Marcos Jr.
Niini, naugmad ang mas taas nga termino alang sa kasamtangang mga opisyal sa Barangay ug SK ug gihatagan ug dugang higayon ang komisyon sa pagpangandam sa eleksyon.
