Gibuhi pag-usab ang sugyot nga magpahugot sa access sa mga bata nga edad 15 paubos sa social media human sa bayolenteng nga pagpamusil sulod mismo sa eskwelahan sa Tacloban City niadtong Lunes, Hunyo 22.
Matod ni Senador Joel Villanueva, nga karon nangulo sa Senate Committee on Higher, Technical and Vocational Education, kinahanglan susihon ang nagkalain-laing butang nga nakaimpluwensiya sa kinaiya ug kahimtang sa mga kabatan-onan, apil na ang ilang pagka-expose sa delikadong mga content online.
Gipasiugda niya nga ang maong insidente nagpakita sa panginahanglan sa pagtuon sa mga pamaagi aron mapalig-on pa ang pagpanalipod sa mga bata o menor de edad, lakip na ang mga sugyot nga magpahugot sa access sa social media sa mga 15 anyos paubos.
Sa karon, adunay pipila ka mga sugyot balaodnon nga nagtinguha sa pag-regulate sa paggamit sa social media sa mga menor de edad nga nagpabilin nga wala pa mapasa sa Kongreso.
Giduso usab sa senador ang mas kusog nga mental health programs sama sa pagdugang sa gidaghanon sa guidance counselors aron suportahan ang panginahanglan sa mga estudyante.
Nanawagan usab ang mambabalaod nga susihon ang safety ug threat-assessment protocols sa mga eskwelahan sa tibuok nasud, sama sa pagpaayo sa pag-ila sa mga warning signs sa kapintasan, mas lig-on nga koordinasyon tali sa mga eskwelahan, mga ginikanan, lokal nga gobyerno ug mga law enforcement agencies, pagpalapad sa anti-bullying initiatives, ug pag-update sa emergency response plans.
