Wala pa’y opisyal nga pahayag ang gobyerno sa pamahayag ni Senator Imee Marcos nga temporaryong undangon ang kontribusyon sa mga government benefits lakip na ang Social Security System o SSS.
Sumala kang Noel Nacion, Communications Officer sa SSS Mindanao South II Division, dili pabor ang maong ahensya sa maong suhestiyon tungod kay direktang maapektuhan ang mga miyembro niini. Gipasabot ni Nacion nga ang gidak-on sa benepisyo nga madawat sa usa ka miyembro nagdepende sa kadaghan sa iyang kontribusyon.
Kung ihunong ang pagbayad sa kontribusyon, posibleng moubos ang total contributions sa usa ka miyembro nga maoy basehan sa computation sa benepisyo sama sa pension, sickness, maternity ug disability claims.
Dugang pa, mahimo usab nga maapektuhan ang eligibility sa usa ka miyembro sa pag-avail sa mga benepisyo. Adunay posibilidad nga dili sila maka-qualify kung moabot ang panahon nga ilang kinahanglanon kini, ilabina kung kulang ang ilang hulog sulod sa gitakdang panahon nga ginakinahanglan sa SSS.
Busa, padayon nga gina-awhag sa SSS ang mga miyembro nga magpadayon sa ilang kontribusyon aron maseguro ang ilang proteksyon ug benepisyo sa umaabot.
