Gipasiugda ni House Speaker Martin Romualdez ang dedikasyon sa nasud sa pagpasiugda sa paglungtad sa usa ka tinuod nga “business-friendly climate”pinaagi sa malungtarong legislative ug regulatory forms.
Ang Speaker mihimo sa pamahayag atol sa breakfast interaction nga gipahigayon sa Philippine delegation sa 2025 World Economic Forum uban sa mga top business executives sa Davos, Switzerland.
Matod ni Romualdez, ang iyang giingon nga gusto sa Pilipinas mao ang pagpasiugda sa nasudnong kalamboan nga magtukod og lig-on nga panag-uban ug makadani sa foreign investments.
Gihisgotan usab niini ang Corporate Recovery and Tax Incentives for Enterprises to Maximize Opportunities for Reinvigorating the Economy o CREATE MORE Act nga gipirmahan ni Presidente Bongbong Marcos niadtong Nobyembre isip kabahin sa reform agenda sa administrasyon.
Gipasabot ni Romualdez nga ang CREATE MORE gimugna aron mapadali ang momentum sa pamuhunan pinaagi sa pagtanyag sa gipausbaw nga mga insentibo sa buhis, pagpahapsay sa proseso sa pag-apruba sa pamuhunan, pagpayano sa mga lagda sa VAT ug paghatag ug gipunting nga mga insentibo alang sa mga estratehikong pamuhunan.
Ang balaod tin-aw nga nagpakita sa positibo nga panglantaw diin ang administrasyon mipasalig sa paghimo sa investment framework nga epektibo.
Dugang pa ni Romuadez nga gipakita sa inisyatibo ang pamaagi sa Pilipinas sa palisiya sa ekonomiya nga naglakip, adaptive ug ang solidong kolaborasyon tali sa gobyerno ug sa pribadong sektor.
Gitataw sa lider sa Kamara nga dili sama sa mga nasud nga nagtutok sa ilang kaugalingong ekonomiya, ang Pilipinas magpabiling bukas ug andam sa pagtubag sa kalibotanong komunidad..
