GENERAL SANTOS CITY – Otsenta porsyento ang gihatag nga grado ni Atty. Teodoro Sales sa katibuk-ang presentasyon ni Pangulong Rodrigo Duterte sa iyang SONA.
Sumala pa sa inilang abogado dinhi sa dakbayan nga war against drugs sa nasud ang pinakamaayong programa sa adminsitrasyong Duterte.
Husto lang nga tutukan pag-ayo sa gobyerno ang pakigbatok kontra sa iligal nga droga tungod siguradong makaguba kini sa kaugmaon sa mga kabatan-unan og sa katawhan.
Sa rekasyon usab ni Atty. Sales may kalabotan sa TRAIN law, gibutyag niini nga ‘katamaran’ matud pa nga ipatong sa katawhan ang buhis.
Giangkon nga supak sa maong balaud tungod ginabuhisan ang mga produkto sama sa nag-unang palaliton, produktong petrolyo og uban pa. Dili kini maayo og ang mga dagkong negosyante unta ang angayang gukdon sa gobyerno aron mubayad ug saktong buhis.
Kahibaluan nga daghan ng ga-angal sa pagtaas sa mga presyo sa produkto nga hinungdan sa implementasyon sa TRAIN Law.
Samtang, may kalabotan sa pahayag ni Pangulong Duterte nga wala siyang ilusyon nga okupahon ang pwesto niini isip Pangulo sa nasud nga sobra sa iyang termino nga maoy gitakda sa balaud.
Matud pa ni Atty. Sales, hulaton nga mahuman nag termino sa Pangulo una magkomento kalabot sa performance niini.
Sa iyang pahayag, ang unom ka tuig dili maayo sa usa ka maayo nga Presidente o ang unom ka tuig dugay na kaayo sa dili maayo nga Pangulo.
Una ng gihingusgan sa Malakanyang nga dili interesado si Pangulong Duterte nga lugwayan pa ang iyang termino bisan bag-uhon pa ang batakang balaud.
Klaro ang posisyon sa Pangulo nga hangtud 2022 lamang siya sa Malakanyang.
Ang term extension gipalutaw sa Kongreso tungod sa pagduso sa Charter Change o CHACHA.
