Gilimod nila ni Senador JV Ejercito ug Raffy Tulfo sa pagpangulo sa Senate Blue Ribbon Committee nga nag-imbestigar sa giingong kurapsyon sa mga flood control projects.
Kini human ni-resign si Senate President Pro Tempore Panfilo “Ping” Lacson taliwala sa mga pasangil ug kasagmuyo sa pipila ka mga senador sa direksyon sa imbestigasyon sa komitiba.
Matod ni Tulfo, bisan og nalipay siya nga nalakip ang iyang ngalan sa konsiderasyon, dili niya madawat ang pagkapangulo niini tungod kay dili siya gusto nga mawad-an sa pagtagad sa tulo ka mga committee chairmanship nga iyang gihuptan sa pagkakaron.
Alang kang Ejercito, bisan og mapasalamaton sab siya sa pagsalig sa iyang mga kauban sa Senado, nipili siya sa pagbalibad tungod kay matod niya mas daghan ang mga senador nga mas makamao mangulo sa komitiba.
Dugang pa ni Ejercito nga personal niyang gisultihan si Senate President Vicente “Tito” Sotto III nga mas maayo nga magtudlo og laing senador sa maong posisyon.
Nanghinaot ang senador nga tukion pag-usab ni Senador Lacson ang iyang pagluwat sa katungdanan tungod kay matod niya naklaro na ang mga isyu nga misangpot sa iyang desisyon.
Gipasalig usab ni Ejercito nga walay dautang buot sa mga senador labot sa maong butang.
