Posible nga dili na hatagan og aksyon sa Supreme Court ang mosyon sa grupo ni Atty. Israelito Torreon may kalabotan sa nagpadayon nga impeachment trial ni Bise Presidente Sara Duterte.
Kahinumduman, nagpasa ang grupo ni Torreon og manifestation nga nangayo og Temporary Restraining Order (TRO) ug status quo ante order aron mapahunong ang impeachment trial, samtang ilang gikuwestyon ang pagpili kang Senador Chiz Escudero isip presiding officer tungod sa giingong paglapas sa kasamtangang balaod.
Sumala kang University of the Philippines professor Atty. Michael Tiu Jr., kaniadto wala manghilabot ang Supreme Court sa mga miaging impeachment trial nga nahitabo sa nasud.
Gipasabot sa abogado nga ang bag-ong manifestation sa grupo ni Torreon kabahin o dugang lamang sa ilang unang petisyon nga nagkuwestyon sa upat ka impeachment complaint nga gisang-at batok kang VP Sara.
Tungod kay nagsugod na ang impeachment trial, posible nga dili na kini hatagan og dakong pagtagad sa Korte Suprema ug tugotan na lamang ang pagpadayon sa proseso.
Nagtuo si Atty. Tiu nga tungod kay nagsugod na ang trial ug nakapresentar na og mga ebidensya, dili na ipabalik sa Supreme Court ang kaso sa una niining kahimtang, nga sukwahi sa gipangayo nga status quo ante order sa grupo sa mga abogado.
