Gisaad ni Parañaque 2nd District Representative Brian Yamsuan nga mangita og alternatibong pondo alang sa Commission on Higher Education o CHED ubos sa 2027 national budget, kon mahimong balaod karong tuiga ang panukalang pagtangtang sa travel tax.
Sa pagkakaron, mokabat sa 40 porsyento sa kinatibuk-ang koleksiyon gikan sa travel tax ang napadulong sa CHED. Kabahin niini ang gigamit isip pondo sa Higher Education Development Fund o HEDF.
Matud ni Yamsuan, kinahanglan nga maseguro nga dili maapektuhan ang mga programa sa CHED, lakip na ang scholarships, research, ug uban pang proyekto alang sa higher education.
“Magtrabaho kami sa Kongreso aron mangita og alternatibong tinubdan sa pondo sa higayon nga mahimong balaod ang pagtangtang sa travel tax,” matud ni Yamsuan kang CHED Chairperson Shirley Agrupis atol sa pagdungog sa House Committee on Appropriations’ budget deliberations niadtong miaging semana.
Una nang gipahayag ni CHED Chairperson Shirley Agrupis nga mahimong mawad-an og 85.6 porsyento sa pondo ang HEDF kon hingpit nang tangtangon ang travel tax ug walay ipuli nga tinubdan sa pondo.
Gi-aprobahan na sa House of Representatives niadtong Marso 16 ang panukalang balaod nga nagtangtang sa travel tax.
Samtang, giawhag ni Yamsuan ang CHED nga makigkonsultasyon sa mga Local Universities and Colleges o LUCs aron mas daghan niini ang mahimong kuwalipikado alang sa Tulong Dunong Program o TDP.
Naghatag ang TDP og hangtod P7,500 kada semestre o P15,000 kada school year alang sa mga kwalipikadong estudyante sa kolehiyo.
Sa 170 ka LUCs sa tibuok nasod, 116 lamang ang giila sa CHED ug kuwalipikadong makadawat sa TDP grants.
Matud ni Yamsuan, adunay pipila ka mga aplikante sa iyang distrito nga wala makadawat sa ayuda tungod kay dili accredited sa CHED ang ilang eskwelahan o kurso.
