Gibutyag ni Caloocan Rep Edgar Erice nga plano sa usa ka sakop sa Independent Commission for Infrastructure (ICI) nga moluwat sa iyang katungdanan tungod sa kakuwang o limitadong gahom sa Komisyon.
Sa iyang privilege speech sa plenaryo si Erice niingon nga personal niyang nahinabi ang maong sakop sa ICI.
Tungod niini, giawhag ni Erice ang Kongreso nga mopasar og balaudnon nga maghatag og contempt powers sa Komisyon.
Matod ni Erice nga nawad-an na og paglaom ang maong sakop sa ICI tungod sa ilang limitadong gahom.
Matod niya nga kon walay contempt powers ang ICI, mas maayo nga ang National Bureau of Investigation (NBI) ug ang Ombudsman maoy mosusi.
Gitataw sa Kongresista nga ilang hangyoon nga ma-certify na nga urgent ang nasangpit nga balaudnon ug mopatawag og special session kalabot niini.
Sa pagkakaron, wala pay tubag ang Palasyo sa Malacañang sa pahibawo ni Erice.
